"وع وع وع .. الموت للخونة , متى تجي الدراسة يا قوم ؟" , هذا ما يقوله بعض من أصدقائي الأعزاء في هذه الأيام , تخيلوا أقول هالكلام ؟!! يا شيخ مستحيل ! , يا لبّى العطلة , عموماً سأتحدث في هذه التدوينة عن الإجازة الصيفية هذه السنة .. وسأشنف أسماعكم غصبن عليكم بكلامي الذي يقطر عسلاً ..
في الحقيقة لا تختلف عندي هذه الإجازة عن سابقتها سوى بالنادي الصيفي بحكم تغير نظامه عليّ , صراحةً نظام النوم هو نفسه , نفس ساعات اللعب وتضييع الوقت , نفس المواقف تحصل , لا تغيير للروتين , وهذا ما يقلقني يا جماعة الربع , يعني اليوم عبارة عن النادي الصيفي , متى ما انتهى اعتبرت اليوم خلص , لأني أرجع ألعب السوني وخذلك نفس كل ليلة , اللهم رتب وبرستيجات ؟ وش هالكلام الفاضي ؟ , المقصد أحس إني أضيع وقتي , والمفروض إني أستفيد من وقتي بأي شيء , على الأقل ، تخلص الإجازة وأنا أحس إن أنجزت شيء , وهذا النقطة اللي أحرص عليها دايم , المشكلة هنا إني إنسان عجّاز , بطّال , مهمل , ولا كان دبرتلي برنامج إستفادة ولا شيء , بيني وبينكم .. ما همن إني ما استفدت شيء , الصراحة أخاف تقضي الإجازة على طول وتجي الدراسة يخرب بيتها !!
ندخل بصلب الموضوع ألا وهو الطفش والإجازة الصيفية .. أو الإجازة الصيفية والطفش كله واحد , كثير من الشباب ممن هم في سني قد يستمتع بأول الإجازة , إما بالبلاستيشن أو الكمبيوتر أو التلفاز , لكن بعد مرور فترة راح يمل ويطفش , ويا ليت هالطفش هذا يرجع علينا بالخير , تلقاه يا إما يدور بالشوارع ويفسد عيال الناس , ولا إذا كان كافن شره الله يامنكم وصارت عنده كاميره جمّع عيال خالته بالبيت وخذلك تصوير ملاغة وارفع على اليوتيوب , والصنف الثالث شغل طووط , إلا ما ندر مثلي وصارعندهم مركز صيفي يشفط ( يسحب ) كمية كبيرة من الطفش , أنا ما أقول إن كل الناس كذا , لا بالعكس تلقى ناس محترمة ومشغله وقتها بالمفيد , حفظ قرآن ولا حديث ولا قراية كتب , يا شيخ لو يناظر دسكفري أهم شيء يستفيد بس ؟!
طبعاً لو سألتوني عن الحلول ما راح أجاوب , لأني أعتقد إنه لكل واحد منا حل مناسب له , إشغال الوقت بالقرآن يمكن ينفع لي وما ينفع لفلان , حظور دورة تدريبية ينفع لفلان ولا ينفع لي , لكني أقترح حلول بسطية تقضي فيها على الطفش :
1- لو تقترح على أخوياك اللي تمام إنكم تنظمون إجتماعات أسبوعية أو يومية تقضون فيها الوقت مع بعض .
2- لو عندك سوني طق لك شرطان جدد .
3- لو عندك مهارات بالتصميم اشتغل بمقابل مادي .
4- سوق الخضرة يمدحونه .
5- فلوريدان ( أستهبل تراي ) .
وفيه حاجة مهمة , لا تنسى تدعي ربك إنه يشغل وقتك باللي ينفعك ولا يضرك , وإسأله دايمن التوفيق والسداد , وكثّر الإستغفار , وسم بيمينك وكل مما يليك .. أستهبل بعد ..
في النهاية هذا رأيي عن الإجازة الصيفية , وحلول مقترحة مني للقضاء على الطفش , خلوني أسمع منكم ..
السلاآآآآم عليكم ..
2 التعليقات:
" وهـ " نشفت ريقي الله يهديك ،، الصراحه كلامك مظبوووط من مايحب الاجازه عفواً الطفش بالعكس الطفش يدل على انك شخص عملي لهذا لا ترضى بالطفش << زودتها تراك ^_• ،،، من وجة نظري انت اللي تحدد هل الاجازه طفش او لا اذا صرت تبي كل شي يجيك على كفوف الراحه انسى لازم تستغل فراغك باللي انت مبدع فيه يعني مثلاً : فيه ناس ماشاء الله تحب تركب قطع وتفكك نقول ميكانيكا دور لك ورشه << وش قالولك ؟ ولا اي شي خربان بالبيت وفككه وزبطه . مثلاً : واحد محترف حاسب و" طفش " كل شي مار عليه ادخل دوره وغير جوك وزد معرفتك ... الخ ،،، شف عيال خوالك عمانك رح تمش معهم اطلع مع عمانك مافيها شي ولا ؟؟ << بس اذا تسطرت مالي شغل ،،،،،،هذا اللي عندي وادري ثقلت صفحتك بقوووة ،،، بس عندي سؤال / ليه الاجازه ماتحلا الا بأولها او نهايتها ؟؟؟؟؟؟ من جد محيرني ,,,ومشكور على استضافتك
شكرا علي الموضوع
إرسال تعليق